လုပ်ငန်းတွေ ရောင်းစျေးဘယ်လိုသတ်မှတ်ကြလဲ
ရောင်းစျေး ရောင်းစျေး ရောင်းစျေး
သိပ်ကိုအရေးကြီးတဲ့အရာပေါ့…ဒီစျေးကိုမြင်လိုက်ရုံနဲ့၀ယ်သွားသူရှိသလို လန့်သွားသူလည်းရှိနိုင်တယ်…
ဒါမှမဟုတ် တောင်းလိုက်တဲ့စျေးကနည်းသွားလို့ ကိုယ်ရတဲ့အမြတ်နည်းသွားနိုင်သလို ကိုယ်တောင်းတဲ့စျေးများသွားလို့ ၀ယ်သူနည်းသွားတာလည်းဖြစ်နိုင်ပြန်ပါတယ်…
နောက်တစ်ခုကတော့ မြန်မာပြည်မှာဆိုရင် Brand ရဲ့ အနိမ့်အမြင့်ကိုတောင် စျေးနဲ့ခွဲတဲ့ Market Segment တစ်ခုလည်းရှိပြန်တယ်…စျေးများရင် ဒါဟာကောင်းတဲ့ Brand လို့သတ်မှတ်ပြီး စျေးပေါနေရင် သိပ်မကောင်းဘူးလို့သတ်မှတ်တဲ့ Product တွေလည်းရှိပြန်တယ်…
ဒါဆိုရင် ဒီလောက်အရေးပါတဲ့ ရောင်းစျေးသတ်မှတ်ခြင်းကို ဘယ်လိုသတ်မှတ်ကြလဲဆိုတာ ကျွန်တော်ဒီနေ့ပြောပြပေးချင်ပါတယ်…
တကယ်တမ်းလုပ်ငန်းအကြီးကြီးတွေမှာဆိုရင်တော့ ဒီအဆင့်မရောက်ခင် Market ကို Survey ဆင်းတဲ့အဆင့်အရင်လာပါလိမ့်မယ်…ခုကတော့ ကျွန်တော်က ရောင်းစျေးသတ်မှတ်ခြင်းကိုပဲတန်းပြီးပြောလိုက်ပါရစေ…
—
၁) အရင်းထက်ပိုတင်လိုက်ခြင်း
ဒီနည်းကတော့ အရမ်းကိုရိုးရှင်းပါတယ်…Product ၀ယ်ရတဲ့ကုန်ကြမ်းစရိတ်…အလုပ်သမားခ…ကျန်တဲ့ကုန်ကျစရိတ်တွေအားလုံးကိုပေါင်းလိုက်ပြီးတော့မှ အမြတ်ဘယ်လောက်ဆိုပြီးတင်လိုက်တဲ့နည်းပါ…
အထူးသဖြင့် အရင်တုန်းက SME တွေနဲ့ သိပ်ပြီးမရှုပ်ထွေးတဲ့လုပ်ငန်းတွေမှာသုံးကြတဲ့နည်းလို့လည်း ဆိုရမှာဖြစ်ပါတယ်…
၂) ပြိုင်ဘက်ကိုကြည့်ပြီး ရောင်းစျေးထားခြင်း
ဒီနည်းလမ်းကတော့ အဓိက ပြိုင်ဘက်တွေရဲ့ အခြေအနေကိုကြည့်ပြီး လှုပ်ရှားခြင်းပါပဲ…သူတို့ဘယ်လောက်ရောင်းနေရင်တော့ ငါလည်း စျေးတင်ရောင်းမလား စျေးလျှော့ရောင်းမလားဆိုပြီး လိုက်ညှိတာပါ…
ကျွန်တော်တို့ဆီမှာတော့ များသောအားဖြင့် သူများထက်လျှော့ရောင်းတာများကြပါတယ်…နောက်တော့ လျှော့ကြရင်းနဲ့ သူလည်းတိုင်ပတ် ကိုယ်လည်းတိုင်ပတ် ဖြစ်ကြလေ့ရှိတဲ့အနေအထားပေါ့…
၃) ခံစားမှုတန်ဖိုးပေါ်စျေးသတ်မှတ်ခြင်း
ဒီသတ်မှတ်နည်းကတော့ ၀ယ်သူရဲ့ လိုချင်မှုနှင့် ခံစားမှုအပေါ်မှာမူတည်ပြီး ဆုံးဖြတ်တာပါ…ဖိနပ်ချင်းတူတူ စီးလို့ရတာချင်းတူတူ ကွာလတီချင်းမကွာတာတောင်မှ Brand တစ်ခုကစျေးတော်တော်နည်းနေပြီး နောက် Brand တစ်ခုက စျေးအရမ်းများနေတာမျိုးတွေ့ဖူးကြမှာပေါ့…
ပန်းချီကားတို့ ကျောက်စိမ်းတို့ဆိုရင်လည်း ဒီလိုပါပဲ…လူတွေရဲ့ခံစားမှုအပေါ်မူတည်ပြီးစျေးတွေကွာတတ်ကြတယ်…ဒီနည်းလမ်းကိုသုံးချင်တယ်ဆိုရင်တော့ ကိုယ့်ရဲ့ Value က ဘာလဲဆိုတာ ၀ယ်သူတွေကိုကောင်းကောင်းပြောပြထားနိုင်ရတယ်…၀ယ်သူတွေက သေချာနားလည်နေမှပဲ ပေးချင်တာဖြစ်တယ်…
စျေးကြီးတယ်လို့ခံစားကြတာထက် မတန်ဘူးလို့ ခံစားရလို့မ၀ယ်ကြတာ…
၄) အနိမ့်နဲ့အရင်၀င်ခြင်း
ဒီနည်းလမ်းကတော့ ၀ယ်သူတွေကို ကိုယ့် Product/Service ကို ခပ်မြန်မြန် နဲ့ ခပ်များများ ထိတွေ့စေချင်တဲ့အခါသုံးတာများပါတယ်…အထူးသဖြင့် New Product/New Market ကို ၀င်တဲ့အခါမှာသုံးတာပေါ့…
ကိုယ့်ရဲ့ပြိုင်ဘက်တွေနဲ့ စျေးအတူတူ၀င်ရင် သူတို့က Market ထဲမှာ ရှိနေပြီးသားဖြစ်တဲ့အတွက် သူတို့ကိုပဲရွေးမှာပါ…ဒါကြောင့် စျေးအနိမ့်နဲ့အရင်၀င်လိုက်တယ်…လိုချင်တဲ့ Market Share ရပြီဆိုမှ စျေးကိုဖြေးဖြေးချင်းတင်တာမျိုးပေါ့…
ကျွန်တော့် Consultant အတွေ့အကြုံအရပြောရရင် ဒီနည်းလမ်းက အစကတည်းက Plan သေချာချပြီးလုပ်ခဲ့ဖို့လိုပါတယ်…နောက်ပိုင်း စျေးတက်တဲ့အချိန်မှာ ၀ယ်သူတွေကလက်မခံတော့လို့ စျေးတက်မရဘူးဆိုပြီး ရောက်လာတဲ့ Client တွေနဲ့ကြုံဖူးခဲ့ပြီး ဖြေရှင်းပေးခဲ့ရဖူးလို့ပါ…
၅) မြင့်ရာမှအနိမ့်
ဒီနည်းလမ်းကိုတော့ ဖုန်းတို့ ဖိနပ်တို့လိုမျိုး လောကမှာပိုတွေ့ရတယ်…Design အသစ် Launch လုပ်တဲ့အချိန်မှာ လူစိတ်၀င်စားမှုမြင့်တက်ပြီး နောက်ပိုင်းမှာ စျေးကိုဖြေးဖြေးချင်းလျှော့လာတာမျိုးပေါ့…
ကြာလာလေ စျေးမချချင်တဲ့ Brand တွေအနေနဲ့လည်း ဖြေရှင်းနည်းရှိပါတယ်…
၆) အချိန်နဲ့တပြေးညီ ပြောင်းလဲနေခြင်း
ဒီနည်းလမ်းကတော့ Product တစ်ခုထဲပေါ်မှာတင် မမူတည်ဘဲ ပြင်ပရိုက်ခတ်မှုတွေလည်းရှိတဲ့ Product တွေမှာလည်း သုံးကြတဲ့နည်းပေါ့…
ဥပမာ ရွှေဆိုင်တွေ..အိမ်ခြံမြေစျေးကွက်တွေဆိုရင် ဒီနည်းလမ်းနဲ့ကိုက်ညီကြလေရဲ့…
၇) အမြတ်နည်းနည်း အရေအတွက် များများ
တချို့ Product တွေကျတော့ အမြတ်အများကြီးတင်လို့မရဘူး…ဒီတော့ အရေအတွက်များများကိုထုတ်ပြီးတော့ပဲ အမြတ်များများရအောင် လုပ်ယူရတယ်…
ဥပမာပြရရင် ဘောပင်တို့ မီးခြစ်တို့လို Product တွေပေါ့…
ဒီလောက်ဆိုရင် ကိုယ့်လုပ်ငန်း ကိုယ့် Product အလိုက် ဘယ်လို ရောင်းစျေးထားရမလဲဆိုတာ သဘောပေါက်ကြမယ်လို့ ယူဆပါတယ်…
Bonus အနေနဲ့ နောက်ထပ်သုံးတဲ့နည်းတချို့လည်း ထည့်ပေးလိုက်ချင်ပါသေးတယ်…
Promotion ချခြင်း – ဒါကတော့ ရှင်းပါတယ်…သီတင်းကျွတ်မလို့ ခရစ်စမတ်မလို့ဆိုပြီး စျေးလျှော့ရောင်းတာပါ…
Psychological Pricing – ၁၀,၀၀၀ ကျပ်လို့ ရေးမယ့်အစား ၉,၉၀၀ ကျပ်လို့ရေးပြီးရောင်းတာမျိုးပါ…လူတွေက ၉ ထောင်ကျော်ပဲ တန်တယ်ဟ ဆိုပြီး၀ယ်ကြတာမျိုး…
Premium Pricing – သောက်ရေချင်းတူပေမယ့် Fiji က ထွက်တဲ့ရေမလို့ စျေးကြီးတယ်ဘာညာဆိုပြီး Value Added လုပ်လိုက်တဲ့အခါ Luxury ပိုဆန်သွားမယ်…စျေးပိုယူလို့ရသွားမယ်…ဒါမျိုးပေါ့…
Bundle Pricing – တစ်မျိုးတည်းမရောင်းဘဲနဲ့ တူရာ တူရာလေးတွေစုပြီး စျေးသတ်မှတ်လိုက်တဲ့သဘောပါ…ဥပမာ ဒီအထုပ်ထဲမှာ ခေါင်းလျှော်ရည်၊ ကိုယ်တိုက်ဆပ်ပြာ၊ မျက်နှာသစ်ဆပ်ပြာ ၃ မျိုးပါတယ်…၂ သောင်းခွဲပဲပေး…တစ်ခုချင်းစီ၀ယ်ရင် တစ်မျိုးကို ၁ သောင်းကျမယ်…
ကိုယ့်လုပ်ငန်းနဲ့ကိုက်ညီတဲ့ Pricing နည်းလမ်းကို ချပြီး များများရောင်းကောင်းကြပါစေ…
စိုင်းလူရှား
(Meggarative Marketing Group)
(ဆင်ပေါက်ဖိနပ် – ၁၉၆၀)
